بلاله القواله (قصه من حلتنا )

[الشمشار]

سلامات
اشتهرت بلاله (ما بلاله الصحفيه ماتجيبو لينا الهوا وبالمناسبه انا من اشد المعجبين بكتاباتها ) نعود لي بطله قصتنا بلاله التي اشتهرت بنقل القوالات مما دعا احد خبثاء هذا الزمان ان يطلق عليها بلاله القواله وايضا هناك من اطلق عليها رويتر كنايه عن نقل الاخبار والشمارات
بعد الفاصل نحكي خليكم قراااااااااااااب

[الشمشار]

نعود لي قصتنا
اتمطت بلاله في عنقريب العده الذي قضت فيه ليله متعبه بعد ان كانت الليله السابقه ممطره وحمتها النوم وقبل ان تبارح مكانها سمعت صرخه عاليه فلفحت توبها وقامت تجري
(وشها ماغسلتو ) وعند الباب تذكرت انها لم تغسل وجهها من بقايا كريمات الامس قدر ظروفك التي اشترتها من علويه الحشريه التي اصبحت استثماريه ودي حنجيها في بوست براهو المهم بلاله غسلت وشها في مزيره حاج الامين جارهم وبحاستها الشماريه عرفت انو صوت الصرخه جاي من بيت ناس سميره العويره دخلت بلاله بيت ناس سميره لتجد فاروق نصف العاري زوج سميره وهو يعتدي بالضرب علي زوجته
بلاله
فاروق خسمتك بالنبي شيل يدك منها سميره دي ماعويره ساكت ومسكينه الغنمايه تاكل عشاها
فاروق
بلاله لوسمحتي خليك بعيد خليني اادبه بت ال ............
بلاله
النبي فوقك كان تفكها
وبعد لاي اقتنع فاروق وترك زوجته
وسالته بلاله الحاصل شنو ؟
الحاصل شنو يافاروق ؟
فاروق يرضيك يابلاله انا ماشي الشغل مالقي اي غيار نضيف
بلاله في سرها (ها التقول شغال قنصل )للشمشارين الدايرين يعرفو فاروق شغال شنو فاروق شغال نجار
لا والله اتلومت لكن يافاروق يا اخوي سميره ذاته الله يعينه الاولاد وخدمه البيت بعدين مويه الجن القاطعه طوالي دي تغسل الهدوم كيفن
فاروق والله انا كان ما الاولاد ديل ياكان عرست فوقه ياطلقتها
بلاله في سرها (اريتني العروس )وتواصل بري ياود امي هسي زي سميره دي بعرسو فيها
ثم قالت في سرها (اريتك كان تجيني ) بالمناسبه بلاله بايركس نمره واحد
ثم خرجت بلاله صوب علويه الحشريه ودقت الباب
علويه
هووووووووووووي يالفي الباب خش الباب فاتح
بلاله تدخل تسلم علي علويه وتقول
وووووووووووووووو علي ياعلويه الليله مافاتك فيلم
علويه
فيلم شنو؟ اوعه يكون فيلم روتانا سينما ؟
بلاله
بري فيلم سميره شو امانه الليله ما اخدت دقه قالو فاروق كان عندو قريشات لاميهن وهي كملتن والزاد وغطي ما غسلت لي الهدوم بتاعتو واتشاكلت مع نسيبتها شاديه
علويه
ووووووووووووب علي ده كلو طلع منها
وبعد مده من الزمن خرجت بلاله من منزل علويه وتبعتها علويه بالخروج من منزلها متجهه لي نوال توصل الشمار
انا جاي بس انتو شيلو الصبر

[الشمشار]

والله اتلومت هكذا كان رد نوال عندما سردت عليها بلاله القواله وعلويه الحشريه ماجري وخاصه ان نوال لاتكن الود لسميره العويره واخذن يتحدثن ويقطعن في سميره بقيه ذلك اليوم
في اليوم البعدو كان في سمايه في الحله وطبعا بيوت المناسبات افضل محل للشمارات والقوالات صاحبتنا بلاله استعرضت قواها وهي جالسه في احدي الصواني قالت وفمها محشو بكل ماغرفته من الصحانه التي امامها
اجي يابنات امي هو ذاتو كان ماعوير عرس سميره دي والله انا لو راجل سميره دي كان وقعت لي في الكرتله بخرخر
ضحكت احداهن وقالت لها حب الناس مذاهب يابلاله يا اختي
بلاله
هي لكن الله كمان عرفو بالعقل سميره دي كرعينا الاثنين شمال وعندها حدبه وعيونها صغار متل قدود الجلد
ضحكن النسوان وفي تلك اللحظات دخل امجد يحمل صينيه من الخارج
تقدمت منه كوثر التي عرفت بالشلاقه في الحله اصله مكسره في امجد كسير شديد هنا علقت بلاله
ودي شنو كمان البت المتل جك الكركدي دي
(ههههههههههههه ابدعت بلاله في الوصف فقد كانت كوثر سمينه وترتدي اسكريتي احمر وبلوزه احمر علي ابيض وتانيه ضفيره شعره )
وقف امجد وناول كوثر الصينيه ووقف في ترقب في انتظار الشاي وعينيه تبحثان عن سمر المكسر فيها وهي ماشغاله بي وبلاله متابعه الحاصل بعد الفاصل جاي عشان اكتب التكمله بتاعه القصه

[الشمشار]

بعد ان انتهت المناسبه صاحبتنا بلاله مشت ليك بيت ناس امجد خشت توش قاصده الرضيه ام امجد وعرفت الرضيه بانها مره بتاعه مشاكل ومستعده تضارب اي زول وفي اي لحظه
بلاله الرضيه ازيك مالي ماشايفاك في بيت نسابتك ديل
الرضيه بدهشه نسابتي منو ؟
بلاله ناس ميمونه الليله ماسمايه بتها سوسن
الرضيه بلاله انتي شاربه شنو ناس ميمونه نسابتي بي منو ؟؟
بلاله ولدك امجد
الرضيه
منو؟
بلاله سجم خشمي انتي ماعارفه انو امجد ولدك داير سمر بت ميمونه وشوف عيني ميمونه تشيل وتتكبكب فيهو
الرضيه
بلاله انتي جنيتي ؟
بلاله كان ما مصدقاني ارحكي النوريك تشوفي بي عينك ولدك كاتلنو بالخدمه في بيت السمايه
ذهبتا الي حيث بيت ميمونه لتجدا امجد الممكون يتجاذب اطراف الحديث مع سمر هنا ثارت ثائره الرضيه التي قضت علي الاخضر واليابس في بيت السمايه
نقطه سطر صغير
كم من شخص يسعي بالنميمه ويخرب العمران
نقطه سطر طويييييييييل
القصه انتهت انتظرو القصه الجايه قريب كان الله احيانا

[ابوبشار]

الشمشار انا خايف قصصك دي تقلب

[مشرور]

مشكور الأخ الشمشار ابداع والله سرد مافيهو اي كلام وقصه جميله وواقعيه جداً وتحدث في ارقى المجتمعات .

[الشمشار]

الشمشار انا خايف قصصك دي تقلب

ابو بشار تقلب شنو ؟ ههههههههه اوعه يكون ..............

[الشمشار]

مشكور الأخ الشمشار ابداع والله سرد مافيهو اي كلام وقصه جميله وواقعيه جداً وتحدث في ارقى المجتمعات .

مشرور دائما مالك بصمه جميله في كل ما اكتب سلمت وسلمت مداخلاتك